وزیراعظم آزاد جموں و کشمیر سردار عبدالقیوم نیازی نے کہا کہ آزاد کشمیر کی تعمیر وترقی کے لیے ہمارے پاس فنڈز کی کوئی کمی نہیں، وزیراعظم پاکستان عمران خان کے ویژن کے مطابق آزاد کشمیر کو مثالی ریاست بنائیں گے جس میں لوگ حقیقی معنوں میں تبدیلی محسوس کریں گے- میں آزاد کشمیر کے چپے چپے واقف ہوں،عوامی مسائل سے بخوبی آگاہ ہوں، ماضی کی زیادتیوں اور محرومیوں کا ازالہ کریں، ان خیالات کا اظہار انہوں نے وزارتِ عظمیٰ کا منصب سنبھالنے کے بعد اپنے آبائی حلقے آمد کے موقع پر ہجیرہ، منڈول اور بٹل میں مختلف عوامی جلسوں سے خطاب کے دوران کیا۔۔ بٹل کے سیاسی و سماجی رہنما سردار غلام زکریا نے وزیراعظم کو منصب سنبھالنے کے بعد پہلے بار حلقے آمد پر سونے کی شیلڈ پیش کی۔۔ ہجیرہ، ککوٹہ، منڈھول اور بٹل کے مقام پر وزیراعظم سردار عبد القیوم نیازی کا شاندار استقبال کیا گیا۔۔ اس موقع پر ان کے ہمراہ وزرا کرام سردار فہیم اختر ربانی، محمد اکمل سرگالہ، دیوان علی چغتائی، ظفر ملک، چوہدری محمد اخلاق، نثار انصر ابدالی اور ممبر کشمیر کونسل سردار رزاق بھی تھے، مختلف مقامات پر استقبالیہ جلسوں سے خطاب کرتے ہوئے وزیراعظم آزاد جموں و کشمیر نے کہا کہ تحریک انصاف کی حکومت عوامی مسائل کے حل کے لیے وعدے نہیں بلکہ عملی اقدامات اٹھائے گی،میں اور میری کابینہ کے تمام اراکین عوام کے خادم ہیں، حکومتی مشینری عوام کی خدمت کے لیے ہمہ وقت دستیاب ہے، آزادکشمیر میں ترقی خوشحالی کے نئے دور کا آغاز کرنے جارہے ہیں،کچھ عرصہ میں آزادکشمیر کے عوام حقیقی معنوں میں تبدیلی محسوس کریں گے،عمران خان کے ویژن کے مطابق نچلے طبقے کو اوپر لانے کے لیے عملی اقدامات اٹھائیں گے،اللہ رب العزت نے اقتدار عوام کی خدمت کے لیے دیا،عوام کو مایوس نہیں کریں گے۔ انہوں نے کہاکہ تحریک آزادی کشمیر ہماری حکومت کی اولین ترجیح ہے، ہندوستان کے بدترین ظلم و جبر کے سامنے کلمہ حق کہنے والے مقبوضہ کشمیر کے عوام کو سلام پیش کرتا ہوں ، میں خونی لکیر پر رہنے والوں کے مسائل سے بخوبی واقف ہوں، ایل او سی پر رہنے والے تمام لوگوں کے مسائل ترجیح بنیادوں پر حل کریں گے، مجھے ایل او سی کے عوام کی مشکلات کا احساس ہے۔انہوں نے کہاکہ گزشتہ ادوار کی محرومیوں اور زیادتیوں کا ازالہ کریں گے، جن لوگوں نے ریاستی وسائل کو لوٹا، ان کا کڑا احتساب ہوگا، کرپٹ عناصر کو کٹہرے میں لائیں گے، عمران خان کے ویژن کے مطابق احتساب کے نعرے کو عملی جامہ پہناؤں گا اور سستے انصاف کی فراہمی کو یقینی بنایا جائیگا۔ انہوں نے کہاکہ عوامی خدمت کا جذبہ رکھنے والے اپوزیشن ممبران اسمبلی کے ساتھ بھی بھرپور تعاون کروں گا، جلسوں سے وزرا کرام نے خطاب کرتے ہوئے کہا کہ وزیراعظم پاکستان عمران خان کے ویژن کے مطابق سردار عبد القیوم نیازی کی قیادت میں بھرپور طریقے سے عوام کی خدمت کریں، کشمیر کو کرپشن فری معاشرہ بنائیں گے۔۔ بعدازاں وزیراعظم نے اپنے آبائی گاؤں درہ شیر خان کے مقام پر اپنے والدین کی قبر پر حاضری دی اور فاتحہ خوانی کی۔۔ ٭٭٭٭٭٭
55