آزادکشمیر میں کوئی قانون قرآن و سنت سے بالا تر نہیں ہو سکتا ۔صدرآزادکشمیر بیرسٹرسلطان محمود چوہدری

صدر آزاد جموں وکشمیر بیرسٹر سلطان محمود چوہدری نے کہا ہے کہ آزادکشمیر میں کوئی قانون قرآن و سنت سے بالا تر نہیں ہو سکتا میں جب وزیر اعظم تھا تو میں نے اس سلسلے میں سیرت کانفرنس بلائی تھی اوراب بھی جلد ہی سیرت کانفرنس بلا کر دوبارہ ان چیزوں کا جائزہ لیا جائے گا کہ کوئی قانون قرآن و سنت کے منافی تو نہیں۔ آزادکشمیر میں مذہبی ہم آہنگی کی فضا ہے اورہمیں اسے جاری رکھنا ہے۔ بھارت میں مودی سرکار کی ترجمان نپور شرمانے حضور ﷺ کی شان میں گستاخی کر کے پوری دنیا کے مسلمانوں کے جذبات مجروع کیے ہیں۔ بھارتی سپریم کورٹ بھی اس کے خلاف بول پڑی ہے جبکہ مودی اب بھی نپور شرما کی حمایت میں ہے۔ جبکہ 20سے زائد مسلمان ممالک کی وزارت خارجہ نے بھارتی سفیروں کو بلا کر اس پر زبردست احتجاج کیا ہے۔اس سلسلے میں علماء کرام بھی اپنا کردار ادا کریں۔ ان خیالات کا اظہار انہوں نے آج یہاں ایوان صدر کشمیر ہاؤس اسلام آباد میں علماء کے ایک وفد سے ملاقات کے دوران کیا۔ اس موقع پر وفد میں ممبر قانون ساز اسمبلی و پارلیمانی سیکرٹری حکومت آزادکشمیر علامہ مولانا پیر مظہر سعید، چیئرمین علماء مشائخ کونسل امتیازاحمد صدیقی، مفتی محمد عارف نقشبندی رکن اسلامی نظریاتی کونسل کوٹلی، مفتی سید وجاہت حسین سوہاوی سجادہ نشین دربار عالیہ سوہاوہ شریف، میاں ضیا المصطفیٰ سجادہ نشین دربار عالیہ کئیاں شریف، مولانا محمود الحسن اشرف امیر آل جموں وکشمیر جمعیت علماء اسلام، پیر سید غلام یاسین شاہ گیلانی کوٹلی، مفتی محمد اختر رہنماء آل جموں وکشمیر جمعیت علماء اسلام، علامہ الطاف حسین سیفی رکن اسلامی نظریاتی کونسل مظفرآباد، قاری محمد شفیق مدرسہ تجوید القرآن ٹرسٹ ضلع باغ، مولانا مظفرحیات ہارون مرکزی سیکرٹری جنرل قراء تجوید القرآن ٹرسٹ، پیر سید منظر حسین گیلانی سیری پیرا باغ، قاری محمد بشیر بیر پانی باغ، ملک شوکت عارف مرکزی سیکرٹری اطلاعات جمعیت علماء اسلام آزادکشمیر، علامہ منظور حسین قادری مظفرآباد، صاحبزادہ عدیل احمد گیلانی مظفرآباد، علامہ محمد پرویز قریشی مظفرآباد، مفتی ضمیر احمد ساجد اسلام آباد، مفتی اسلم اسلام آباد، مولانا حافظ عتیق الرحمان اسلام آباد، صاحبزادہ سہیل احمد نقشبندی وائس چیئرمین علماء مشائخ کونسل،سردار محمد بلال چشتی رہنماء سنی تحریک آزادکشمیر اور دیگر علماء کرام بھی موجود تھے۔ اس موقع پر صدر آزاد جموں وکشمیر بیرسٹر سلطان محمود چوہدری نے مزید کہا کہ ہم علماء کرام کے مسائل ترجیحی بنیادوں پر حل کریں گے۔ قاری، خطیب حضرات کی تنخواہوں میں اضافہ اور دیگر مسائل بھی حل کیے جائیں گے اور اس سلسلے میں ہم آئندہ بھی اپنی کوششیں جاری رکھیں گے۔ میں علماء کرام کا شکر گزار ہوں کہ انہوں نے اسلام آباد اور مظفرآباد میں منعقدہ کل جماعتی ریلیوں میں بڑھ چڑھ کر حصہ لیا۔ اس موقع پر علماء کرام نے صدر ریاست آزاد جموں وکشمیر بیرسٹر سلطان محمود چوہدری کی مسئلہ کشمیر کو بین الاقوامی سطح پر اُجاگر کرنے، مقبوضہ کشمیر میں جاری انسانی حقوق کی پامالی اور یاسین ملک کا مسئلہ انٹرنیشنل فورمز پر اُٹھانے پر انہیں زبردست خراج تحسین پیش کیا اور اس امر کا اعادہ کیا کہ وہ ہرمسئلے پر صدر ریاست آزاد جموں وکشمیر بیرسٹر سلطان محمود چوہدری کے ساتھ ہیں۔
٭٭٭٭