وزیراعظم آزاد جموں و کشمیر سردار تنویر الیاس خان نے کہا ہے کہ بلدیاتی الیکشن ہر حال میں ہونگے۔آزادجموں و کشمیر کے اندر اسوقت لوگوں کے اندر خوشی اور ولولہ ہے کہ اکتیس سال بعد بلدیاتی انتخابات ہونے جا رہےہیں۔وفاق سے امید ہے کہ وہ ریاست کے عوام کی خواہشات کا احترام کرتے ہوئے مطلوبہ سیکیورٹی فراہم کریگا۔ہم نےمنصوبہ بندی کررکھی ہے انشاء اللہ بلدیاتی الیکشن ہر حال میں کروائیں گے۔وزیراعظم نے ان خیالات کا اظہار رکن اسمبلی و پارلیمانی سیکرٹری جاوید بٹ کی بھانجی کی شادی کی تقریب میں صحافیوں سے غیر رسمی بات چیت کرتے ہوے کیا۔اس موقع پر مشیر حکومت حافظ حامد رضا ،ممبراسمبلی و پارلیمانی سیکرٹری جاوید بٹ،ممبر اسمبلی امتیاز نسیم،زاہد تبسم بھی موجود تھے۔وزیراعظم نے کہا کہ ہم نے ہر جگہ ہر کلیئر مؤقف اختیار کیا ہے ، وفاقی حکومت سے بھی کہا ہے،حکومت اس سلسلے میں اپنی ذمہ داریاں پوری کرے گی،جہاں تک دوسرے اداروں کی ذمہ داری بنتی ہے جیسا کہ وفاقی حکومت کی ہمیں یقین ہے کہ وہ بھی اس سلسلے میں اپنی ذمہ داریاں پوری کرے گی۔انہوں نے کہا کہ ہم ان پرکوئی احسان نہیں کر رہے بلکہ ان کا حق ان کو لوٹا رہے ہیں اور اپنی ذمہ داریاں پوری کر رہے ہیں،ریاست کے ہر شہری کا حق ہے کہ وہ اپنے روزمرہ کے معاملات،گلی،محلے،وارڈ، یونین کونسل کی ترقی میں بڑھ چڑھ کر حصہ لے۔ایک سوال کے جواب میں وزیراعظم نے دوٹوک لفظوں میں کہا کہ الیکشن ہر حال میں ہونگے،وفاق کو سیکیورٹی کا کہا ہے،ہمارے پاس بھی پلان اے ، بی اور سی موجود ہیں۔ہمیں وفاقی اداروں پر پورا اعتماد ہے کہ وہ ریاست کے لوگوں کی خواہشات کا احترام کرتے ہوے حکومت کے ساتھ تعاون کریں گے۔
تنویر الیاس
