صدر آزاد کشمیر بیرسٹر سلطان سے ترک سفیر کی ملاقات، کشمیری عوام کے حق خودارادیت کی مکمل حمایت کی جائے،صدر آزاد کشمیر مسئلہ قبرص کا حل دو ریاستوں کا قیام ہے کیونکہ یونانی اور ترکیہ قبرص اکٹھے نہیں رہ سکتے۔ یونان نے پہلے ہی یونانی قبرص بنا لیا ہے اور اب ضرورت اس امر کی ہے کہ دونوں ریاستوں کا قیام عمل میں لایا جائے۔ یہ اس لئے بھی ضروری ہے کہ یہ دونوں ریاستیں یورپ میں ہیں ان خیالا ت کا اظہار انہوں نے ایوان صدر کشمیر ہاؤس میں پاکستان میں تعینات ترکی کے سفیر ڈاکٹر مہمت پکاچی (Dr. Mehmet Pacaci)سے تفصیلی ملاقات میں کیا۔ اس موقع پر بیرسٹر سلطان اور پاکستان میں تعینات ترکی کے سفیرڈاکٹر مہمت پکاچی(Dr. Mehmet Pacaci) کے درمیان اس بات پر بھی اتفاق کیا گیا کہ مل جل کر کشمیری عوام کے حق خودارادیت کی حمایت حاصل کرنے کے لئے کوششیں کی جائیں گی ترکی نے ہمیشہ کشمیری عوام کے حق خودارادیت کی حمایت کی ہے جبکہ اسی طرح پاکستان کے علاوہ کوئی دوسرا ملک نہیں تھا جس نے ترک قبرص کے معاملے میں ترکی کا ساتھ دیا ہو۔ اس موقع پرصدر آزادکشمیر نے پاکستان میں تعینات ترکی کے سفیرڈاکٹر مہمت پکاچی(Dr. Mehmet Pacaci) کو بتایا کہ وہ عنقریب ترکی کا دورہ کریں گے کیونکہ انہیں ترک پارلیمنٹ کی جانب سے دورے کی دعوت دی گئی ہے۔ اپنے دورہ ترکی کے دوران میں ترکی کی حکومت اور پارلیمنٹ سے کشمیری عوام کی حمایت کے لئے بھی کہوں گا۔ اس موقع پر صدر آزادجموں وکشمیر بیرسٹر سلطان محمود چوہدری اور پاکستان میں تعینات ترکی کے سفیرڈاکٹر مہمت پکا چی(Dr. Mehmet Pacaci) کے درمیان باہمی دلچسپی سمیت دیگر امور پر بھی تبادلہ خیال کیا گیا۔
