اسلام آباد وزیر اعظم آزاد حکومت ریاست جموں کشمیر سردار تنویر الیاس خان نے ماحولیاتی آلودگی کےعفریت سے جان چھڑانےکیلئے ایک قدم اور آگے بڑھتے ہوئے آزادکشمیر میں الیکٹرک گاڑیاں چلانے کا پروگرام بنا لیا ، اس سلسلے میں وزیر اعظم نے آزادکشمیر میں ماحول دوست گاڑیوں کیلئے پالیسی کا اعلان کر دیا ہے ، وزیر اعظم سردار تنویر الیاس خان کا کہنا ہے کہ آزادکشمیر میں الیکٹرک گاڑیوں پر حکومت کی طرف سے اگلے چھ ماہ کیلئے ڈیوٹی مکمل طور پر ختم کر دی گئی ہے جبکہ ہائبرڈ گاڑیوں پر ڈیوٹی کم کرتے ہوئے صرف 12 فیصد کر دی گئی ہے۔الیکٹرک اور ہائبرڈ گاڑیاں پانچ سال تک آزادکشمیر کی حدود میں ہی چلائی جا سکیں گی تاہم مسافر گاڑیاں روٹ پرمٹ لیکر پاکستان میں بھی چلائی جا سکیں گی۔وزیر اعظم تنویر الیاس کا کہنا ہے کہ ریاست بھر میں سرکاری ، پرائیویٹ اور تمام مسافر اور مال بردار گاڑیوں کی ہر سال انسپکشن کرانا لازمی ہو گی جبکہ تھرڈ پارٹی کے ذریعے تمام گاڑیوں کی انشورنس کرانابھی اب ضروری ہوگا۔ اس اقدام سے آزادکشمیر میں دہائیوں پرانی گاڑیوں کی جگہ نئی ماحول دوست گاڑیوں کی آمد کا راستہ کھلے گا۔
دریں اثناء وزیراعظم تنویر الیاس نے وسیع تر عوامی مفاد میں مدرسوں اور تعلیمی اداروں میں تشدد پرمکمل پابندی عائد کر دی ہے ، وزیراعظم کی جانب سے احکامات میں کہا گیا ہے کہ تمام تعلیمی اداروں اور مدرسوں میں 6 ماہ کے اندر CCTV کیمرے انسٹال کیے جائیں ، تمام تعلیمی اداروں ، ہسپتالوں ، مدارس اور دیگر پبلک مقامات میں معیاری واش رومز کی سہولت مہیا کی جائے اور ان میں معیاری amenities فراہم کی جائیں ، جملہ تعلیمی اداروں ، مدارس ، ہسپتالوں اور پبلک مقامات کے واٹر سٹوریج ٹینکس کی موثر صفائی و نگہداشت کا خصوصی اہتمام کیا جائے۔ ہر سال واٹرسٹوریج ٹینکس کی specialized چیکنگ اور مانیٹرنگ کا میکانزم اختیار کیا جائے۔
علاوہ ازیں وزیراعظم تنویر الیاس سے راولاکوٹ کے ایک نمائندہ وفد نے ملاقات کے دوران راولاکوٹ کے لیےمختص گندم کے آٹے کا کوٹہ کم ہونے کے باعث لوگوں کو درپیش مشکلات سے آگاہ کیا اور گندم کے آٹے کا کوٹہ بڑھانے کا مطالبہ کیا۔وزیراعظم نے عوامی مطالبہ کے پیش نظر راولاکوٹ کے لیے آٹا کے مقرر کوٹہ میں ایک ہزار ٹن اضافہ کیے جانے کی منظوری صادر فرمائی ہے۔ادھر وزیراعظم تنویر الیاس سے انکی رہائش گاہ پر وزیر قانون فہیم اختر ربانی نے ملاقات کی ۔ملاقات کے موقع پر معاون خصوصی ہمراہ وزیراعظم برائے ترقیاتی منصوبہ جات سردار امتیاز شاہین بھی موجود تھے۔
الیکٹرک گاڑیاں
